Malungun tu
Dainang
marsak do ho inong di
pudian ni ari, andorang so ditopot ho
Panompa mi,
sipata doi alani pangalaho ni pinomparmu, mambaen bagas
jut ni roham
olo muse do, ala dibege
sipareonmu, nahurang sidabuan ni anak
dohot boru
na tinubuhonmi, di huta
parserahan, na so ra holsoan, nang pe sai marhoi-hoi ho
di huta hatubuan, inganan
ni anggi-anggi andorang tubu tu hasiangan on.
diholtingho
do inong siubeonmu, huhut diorui ho harbue sanggomak tu sanggomak
sian
sipaha sada sahat tu sipaha sia,
otik
sian sinarim marrengge-rengge dipaharuar
ho sian baluang mi,
dipamasuk
ho tu bulu potonganmu, asa adong jamahononmu
laho pangoli nang pamuli sude na sian siubeon mi.
dung marhabong au inong,
jala tarbaen au habang
sian ombun na marembas di
tonga-tonga ni langit,
mangaranap simalolong hi,
naeng manghasiholi
pasaut sangkap na mian di
ate-atem na dipatolhasmu
andorang so dirgak dope
simajujung hi…
hape
dang tarjorat au ho, ai nunga mangarade ompu mula jadi nabolon
di
jou ho hatop tu lambung-Na,
lao
paias pahean-Na,
manggorgori
paridian-Na,
mandampol sude ngalut ni daging-NA
huhut
mangendehon ende :
‘sonang di lambung na,
sonang na ro tusi’
manettek ilukki inong,
mangingot sude parsorionmu
na mangalaosi tao
silalahi,
manghaliangi dolog ni
tigaras
manganju umbak ni
haranggaol
suang songoni alogo ni
tulas na songon haba-haba.
dang
mabiar ho inong,
mandalani golap-golap di huta :
sungai
bulu, bengkel, perbaungan, lubuk pakkam,
sipata
so diingotho naung male siubeonmu
nangpe
naung marsori-sori ho di parrengge-renggeanmu
sian
manogot sahat tu bot ari,
asal
ma adong tongosonmu tu anak hasian na marboru ni ibotomi.
e, tahe, inong, inong
namalo manganju
naeng pajojoron hu sude na
buni di atek-atekki,
alai ilukki sai maraburan,
mangambati nanaeng sipatolhasonki
sonang ma ho inong di bagas ni ompu mulajadi nabolon
i
na burju jala parasi roha
i.
modom ma au
ro maho inong tunipikki.
c c c